Davlatimiz rahbarining 2020 yil 30 oktyabrda qabul qilingan “Sog‘lom turmush tarzini keng tatbiq etish va ommaviy sportni yanada rivojlantirish chora-tadbirlari to‘g‘risida”gi Farmoni mahalla va qishloqlarda aholi keng qatlami, ayniqsa, yoshlarni ommaviy sport turlariga jalb qilishda muhim ahamiyat kasb etayotir. Ushbu hujjat ijrosi doirasida joylarda o‘tkazilayotgan “Mahalla kubogi” sport musobaqasi esa huquqbuzarliklar sodir etishga moyil bo‘lgan yoki ichki ishlar idoralari hisobida turgan, ijtimoiy daftarlardagi oilalar farzandlari bo‘lgan 13-16 yoshdagi o‘smirlarning bo‘sh vaqtlarini mazmunli tashkil etib, ular ongu shuuriga sog‘lom turmush ko‘nikmalarini singdirishga xizmat qilmoqda.

“Mahalla” xayriya jamoat fondi tomonidan Andijonda o‘tkazilgan “Mahalla kubogi”ning viloyat bosqichida shahar va tumanlardan saralangan 32 nafar ishtirokchi stol tennisi bo‘yicha o‘z mahoratlarini namoyish etdi.

Qizg‘in bahslarda Asaka, Marhamat va Izboskan tumanlari vakillari faol ishtirok etdilar. Marhamat tumanidagi “Shahriston” MFY yoshlari viloyat birinchiligini qo‘lga kiritib, musobaqaning respublika bosqichida ishtirok etish huquqiga ega bo‘ldi.

“Mahalla kubogi” musobaqasi o‘z doirasida Andijon viloyatida ikki ming nafar yoshlarni qamrab olibgina qolmasdan, ular orasida sportga bo‘lgan qiziqishni yanada mustahkamladi.

Saminjon HUSANOV, 

“Xalq so‘zi”