“Mahalla” xayriya jamoat fondining Toshkent viloyati bo‘limi tomonidan joylarda xayriya tadbirlari o‘tkazish davom etmoqda. Jumladan, Yangiyo‘l shahri va tumanida 8 mart — Xalqaro xotin-qizlar kuni munosabati bilan 10 nafar nuroniy onaxonga bayram sovg‘alari ulashildi. Ularning ayrimlariga nogironlik aravachasi, uy-ro‘zg‘or yumushida zurur bo‘ladigan maishiy texnika vositalari berildi.

— Uzoq yillardan buyon og‘ir xastalikka chalinganman, — deydi Yangiyo‘l tumani “Bo‘ston” MFYda yashovchi 1-guruh nogironi Gulbahor Janberova. — Bayram arafasida ko‘ngil so‘rab kelishganidan sevinchim ichimga sig‘mayapman. Biz kabi imkoniyati cheklanganlar shaxsga ko‘rsatilayotgan muruvvat va doimiy e’tibordan mamnunmiz.

Nurafshon shaharida Navro‘z umumxalq bayrami munosabati bilan “Qadriyat, urf-odat, an’ana va yoshlar” shiori ostida tadbirlar va xalq sayli bo‘lib o‘tmoqda.

Xalqimizning azaliy qadriyatlarini o‘zida mujassam etgan bayramga bag‘ishlangan barcha tadbirlarda mehr-muruvvat asosiy mezon qilib olingan. Nurafshondagi tadbirlarda kam ta’minlangan oilalar farzandlarining sunnat to‘ylari o‘tkazib berildi. Yoshlar o‘rtasida sport musobaqalari o‘tkazilib, g‘oliblarga esdalik sovg‘alari topshirildi.

Shodiyor MUTAHAROV, “Xalq so‘zi”.