Хоразм вилоятининг Қўшкўпир туманида Президентимизнинг 2020 йил 30 октябрдаги “Соғлом турмуш тарзини кенг татбиқ этиш ва оммавий спортни ривожлантириш чора-тадбирлари тўғрисида”ги фармони ижроси доирасида соғлом турмуш тарзини тарғиб қилиш, аҳолининг жисмоний фаоллигини ошириш мақсадида “Соғлом ҳаёт учун 5000 қадам” шиори остида пиёда юриш марафони ўтказилди.

Марафонга аҳолининг барча қатламлари қамраб олинди. Унда Хоразм вилояти Чавандозлар мактаби, Қўшкўпир туман ҳокимлиги, туман ИИБ, Спортни ривожлантириш бўлими, туман Қўриқлаш бўлими, Ўзбекистон ёшлар иттифоқи, Ёшлар ишлари агентлиги, халқ таълими бўлими, “Ватанпарвар” ташкилоти, “Маҳалла” хайрия жамоат фонди, ўқитувчи ва ўқувчилар, тиббиёт ходимлари фаол иштирок этди.

Марафон сўнгида тумандаги спорт мактабида камондан ўқ отиш, от чоптириш, арқон тортиш, миллий кураш ва спортнинг бошқа йўналишларида маҳорат дарслари ҳам ташкил этилди.

Унда спорт усталари томонидан ёшларга камондан ўқ отиш, от чоптириш ва бошқа спорт турлари, уларнинг инсон саломатлигини сақлашдаги аҳамияти тўғрисида маслаҳат ва тавсиялар берилди.

ЎзА