Юртимизнинг ҳар бир гўшаси ўзига хос тароватга ва қадимий обидаларга бой. Лекин шу заминда яшаб туриб, ҳа деганда ўша гўзалликлардан баҳраманд бўла олмаймиз. Шу боис “Маҳалла” хайрия жамоат фонди Қашқадарё вилояти бўлими хайрли ташаббусларни амалга ошириб, ҳудудлардаги нуронийларни республикамизнинг диққатга сазовор гўшаларига саёҳатга олиб бормоқда.

Хусусан, фонднинг Китоб тумани бўлинмаси томонидан ҳудуддаги 42 нафар кекса фахрийлар кўҳна ва навқирон Самарқанд шаҳрининг диққатга сазовор жойлари, тарихий обидалари, муқаддас қадамжолар ва замонавий иншоотлари бўйлаб саёҳатга олиб борилди.

– Жорий йилнинг ноябрь ойи мамлакатимизда “Кексалар учун саёҳат ойлиги” деб эьлон қилиниши юртимиздаги барча кексаларни бирдай хурсанд қилди, – дейди Паландара МФЙ фаоли К.Турдиев. – Самарқанддаги тарихий обидаларга саёҳат қилиб, кўнглимиз тоғдек кўтарилди. Бундай хайрли тадбирларни ташкил қилганлардан бениҳоя миннатдормиз.

Ўлмас Баротов, ЎзА.