“Маҳалла” хайрия жамоат фондининг Тошкент вилояти бўлими томонидан жойларда хайрия тадбирлари ўтказиш давом этмоқда. Жумладан, Янгийўл шаҳри ва туманида 8 март — Халқаро хотин-қизлар куни муносабати билан 10 нафар нуроний онахонга байрам совғалари улашилди. Уларнинг айримларига ногиронлик аравачаси, уй-рўзғор юмушида зурур бўладиган маиший техника воситалари берилди.

— Узоқ йиллардан буён оғир хасталикка чалинганман, — дейди Янгийўл тумани “Бўстон” МФЙда яшовчи 1-гуруҳ ногирони Гулбаҳор Жанберова. — Байрам арафасида кўнгил сўраб келишганидан севинчим ичимга сиғмаяпман. Биз каби имконияти чекланганлар шахсга кўрсатилаётган мурувват ва доимий эътибордан мамнунмиз.

Нурафшон шаҳарида Наврўз умумхалқ байрами муносабати билан “Қадрият, урф-одат, анъана ва ёшлар” шиори остида тадбирлар ва халқ сайли бўлиб ўтмоқда.

Халқимизнинг азалий қадриятларини ўзида мужассам этган байрамга бағишланган барча тадбирларда меҳр-мурувват асосий мезон қилиб олинган. Нурафшондаги тадбирларда кам таъминланган оилалар фарзандларининг суннат тўйлари ўтказиб берилди. Ёшлар ўртасида спорт мусобақалари ўтказилиб, ғолибларга эсдалик совғалари топширилди.

Шодиёр МУТАҲАРОВ, “Халқ сўзи”.